Lesstofur og vinnurými fyrir nemendur háskólans

Lesstofur fyrir nemendur háskólans eru skv. reglum hans á ábyrgð bókasafnsins og þar er aðstaða til vinnu og lestrar fyrir nemendur háskólans. Auk þess hafa bókaverðir beitt sér fyrir því að nemendum standi til boða að lesa og vinna í kennslustofum háskólans utan þess tíma sem þær eru notaðar til kennslu.

Tölvurými og lesstofa á bókasafni

Lesbásar eru fyrir 64 nemendur. Í tölvurými eru 20 tölvur. Inn af tölvurými er lesstofa sem ætluð er til lestrar. Fyrir og meðan á vor- og haustmisserisprófum og sjúkra- og endurtökuprófum stendur eru fartölvur ekki leyfðar í lesstofu. Lampi er við hvert lesborð og eru borðin vel einangruð hvert frá öðru með skilrúmum. Gestir þurfa að rýma básana þegar þeir yfirgefa salinn að loknum vinnudegi sínum. Lokað er milli aðalsafns og lesstofu á kvöldin. Handbækur safnsins eru á lesstofu. Þeir sem nota handbækurnar þurfa að fá þær lánaðar í tölvu í afgreiðslu og skila þeim áður en þeir yfirgefa safnið í þar til gerðan kassa sem er í afgreiðslu safnsins fyrir framan lesstofuna.

Les- og vinnuaðstaða í kennslustofum

Ákveðið hefur verið að beiðni nemenda að opna kennslustofurnar L201, L202 og L203 að kennslu lokinni á degi hverjum til kl. 21:30. Athugið að einhverja daga eru kennslustofurnar uppteknar vegna kennslu eða námskeiða. Forstöðumaður fasteigna og rekstrar gerir þá kröfu að umgengni sé góð þannig að stofurnar séu tilbúnar til notkunar fyrir kennslu að morgni. Nemendum er líka frjálst að nota tölvustofuna K203 til vinnu sinnar þegar ekki er verið að kenna þar. Einnig hefur verið ákveðið að kennslustofa 311 í Borgum verði opin fyrir nemendur þar og geta þeir látið virkja snjallkort sín (nemendaskírteinin) þannig að þeir komast inn í húsið allan sólarhringinn.

Les- og vinnuaðstaða í kennslustofum í prófatíð

Eftirfarandi kennslustofur eru aðgengilegar nemendum í prófatíð og merktar sem lesstofur á Stefaníu: K201, K202, L201, L202, L203, R311 og R312. Athugið að einhverja daga eru kennslustofurnar uppteknar vegna kennslu eða námskeiða. Forstöðumaður fasteigna og rekstrar gerir þá kröfu að umgengni sé góð þannig að stofurnar séu tilbúnar til notkunar að morgni.

Snjall kort

Nemendur háskólans hafa aðgang að lesstofu og tölvurými á bókasafni allan sólarhringinn. Til þess nota þeir snjallkortin sem aðgangskort að húsum skólans en þau eru eins og kunnugt er einnig nemendaskírteini, bókasafnsskírteini og ljósritunarkort. Skírteinin fást afhent í afgreiðslu skólans, nemendum að kostnaðarlausu. Ábyrgð fylgir því að hafa aðgangskort. Korthafi má ekki lána það öðrum heldur aðeins nota kortið til þess að ganga sjálfur um dyr safnsins. Korthafar geta verið við vinnu í lesstofu eftir að sjálfu bókasafninu hefur verið lokað. Þeir sem eru síðastir að yfirgefa bygginguna eru vinsamlega beðnir um að slökkva ljós og loka gluggum.

Bókaverðir